നയിനെന്നൊരു യൂദ പട്ടണം
ദരിശിച്ചേശുവെയാത്ത സ്വാഗതം;
ശവമഞ്ചവുമേന്തിയിണ്ടലോ-
ടെതിർവന്നാരഴലാർന്ന മാനവർ.


വിധവയ്‌ക്കൊരു പുത്രമൃത്യുവാൽ
വിധിയേകിയതിരറ്റ സങ്കടം;
അഖിലം നൊടിയിൽ തകർത്തിടാൻ
വരുമീമൃത്യു തടുത്തിടാവതോ?


“സുതനൊറ്റയൊരുത്തനാണവൾ-
ക്കിഹലോകത്തവലംബമേകിയോൻ;
അവനും മരണം ഭവിച്ചിതാ-
യിനിയിജ്ജീവിതമെത്രെ ദുർവഹം.”


പറയുന്നു ജനങ്ങളീവിധം
വിധിയേത്താൻ പഴിചൊൽവു സർവ്വരും.
മൃതിപീഡിത ജീവിതത്തിനാ-
രരുളും നൽതുണയീശനെന്നിയേ?


കുഴിമാടമടുത്തു വന്നിവൾ
കദനംപേറി ഒഴുക്കിബാഷ്പവും.
എരിയുന്നിതു ശോക വഹ്നിയിൽ
ദുരിതത്താലുഴലും കുടുംബിനി.


"കരയേണ്ടിനിയും സഹോദരീ"
ഉരചെയ്തീവിധമേശു നായകൻ.
കരയും മരണത്തിലേവരും
തരുമോ സ്‌നേഹിതരാശ്രയം ഭുവി?


അലിയുന്നുടയോന്‍റെയുള്ളവും
ചൊരിയുന്നു കരുണാർദ്ര വീക്ഷണം;
മൃതിയിൻ വിഷമാർന്ന മുള്ളുകൾ
തകരുന്നീശ കരം തൊടുന്നതാൽ! 


"എഴുനേൽക്കിനി നിദ്രവിട്ടു നീ"
മൊഴിയുന്നൻപുനിറഞ്ഞ രക്ഷകൻ.
മൃദുഭാഷിത ശക്തിയാൽ ജവം
മൃതിവിട്ടേറ്റു യുവാവു തൽക്ഷണം.

(വൃത്തം: വിയോഗിനി)