വർണ്ണമെഴാത്ത കതിരവ രശ്മികൾ
നിർണ്ണയം കാണാവതല്ലതെല്ലും.
മഞ്ഞുകണികയിലുമ്മവച്ചാലവ-
മഞ്ജുളമോഹന മാരിവില്ലാം.
വർണ്ണമിണചേർന്നമാരിവില്ലേ നിന്നെ
വർണ്ണിച്ചിടാത്ത കവികളുണ്ടോ?


പാപം പെരുകിയ നേരത്തു മർത്യരെ
തോയത്തിലാഴ്ത്തിക്കളഞ്ഞ നേരം
ദൈവം കനിവോടെ കല്പിച്ചുനൽകിയ
വാഗ്ദത്തചിഹ്നമീ മാരിവില്ല്.
സപ്തവർണ്ണങ്ങളാലീശന്‍റെയുൽക്കൃഷ്ട-
ഹസ്തം ചമയ്‌ക്കും വിചിത്ര ചിത്രം!
ഇല്ലിനി മാരിയാൽ മുക്കില്ല ഭൂതലം
ചൊല്ലുന്നു വില്ലും വിലോപമെന്യേ.


സർവ്വവും കാണുമാറാക്കും പ്രകാശവും
ഗർവ്വമെഴാതെ മറഞ്ഞിരിപ്പോ?
സർവ്വം ചമച്ചസർവ്വേശ്വരചാതുര്യ-
മുർവ്വി താരങ്ങളിൽ കാണ്മു ഞങ്ങൾ.


ദൈവീക സ്നേഹ കണങ്ങളീമർത്യരിൻ
ജീവിതം ശോഭനമാക്കിടുന്നു.
സർവ്വാധിപ! നിന്‍റെ സാമിപ്യ ബോധത്താൽ
മർത്യരമർത്യരായ് തീർന്നിടുന്നു.


സ്നേഹമാമീത്തറവാട്ടിൽ ജനിച്ചവ-
രേകകുടുംബത്തിലംഗങ്ങളാം.
ജാതി, മതം, വർണ്ണ ഭേദം മറന്നിടാം
മോദമായ് വാഴാം ധരിത്രി തന്നിൽ.

(വൃത്തം: മഞ്ജരി)